1 Corinthians 14
1 你等愛追求愛心。你等也愛渴慕聖靈个恩賜，特別係傳講上帝真道个恩賜。
2 該用屬靈个語言講話个，毋係對人講話，係對上帝講，因為無人聽抑識；佢係通過聖靈个能力講奧妙个事。
3 總係，傳講上帝真道个，係對人講話，來造就、鼓勵、㧯安慰佢等。
4 用屬靈个語言來講个係造就自家，總係傳講上帝真道个係造就教會。
5 𠊎希望你等全部會講屬靈个語言，總係𠊎還較愛你等有傳講上帝真道个恩賜。因為，用屬靈个語言講話，愛有人翻譯，教會正會得到造就；若無翻譯，傳講上帝真道个就贏過講屬靈語言个。
6 兄弟姊妹啊，𠊎去你等該位个時，若只有用屬靈个語言講話，無對你等講上帝个啟示、智識、預言、抑係教示，對你等有麼介利益呢？
7 連該兜無生命个樂器，像笛仔抑係弦琴，所發出个聲若無高低个分別，所歕个抑係所彈个樣會聽抑識係麼介呢？
8 號筒歕出來个音若無準，麼人知愛準備相㓾呢？
9 共樣，你等用舌乸講話，若無用人聽抑識个話講，麼人知你等講麼介呢？你等就係對空氣講話了！
10 世間有盡多無共樣个語言，總係無一樣毋係愛表達意思个。
11 若係𠊎聽毋識該種語言，對講該種話个人來講，𠊎係外國人，對𠊎來講，佢也係外國人。
12 既然你等渴慕聖靈个恩賜，你等就應當多追求該兜造就教會个恩賜。
13 所以，講屬靈語言个，就愛求上帝賜佢翻譯个能力。
14 若係𠊎用屬靈个語言祈禱，𠊎係用𠊎个靈祈禱，總係𠊎个理智並無作用。
15 愛樣般正好呢？𠊎愛用靈祈禱，也愛用理智祈禱；𠊎愛用靈唱歌，也愛用理智唱歌。
16 若毋係恁樣，你單淨用靈感謝上帝个時，在聚會中聽毋識屬靈語言个人，佢既然毋知你講麼介，愛樣般㧯你同心講「阿愐」呢？
17 恁樣，就算你對上帝感謝个祈禱係盡好个，別人也毋會得到造就。
18 𠊎感謝上帝，𠊎講屬靈个語言比你等大家較多。
19 總係，在教會个聚會中，𠊎較愛講人聽抑識个話；用理智講五句教導人个話較贏講千萬句屬靈个語言。
20 兄弟姊妹啊，你等个思想毋好像細人仔。在壞事方面愛像細人仔，總係思想愛像大人恁成熟。
21 聖經有記載：主講：𠊎愛通過外國人个嘴唇，對這人民講別樣个語言；總係，佢等還係毋聽從𠊎。
22 恁樣看來，講屬靈个語言毋係為到信徒，係愛給毋信个人做記號。總係，傳講上帝个真道毋係為到毋信个人，係愛給信徒做記號。
23 假使全教會聚會个時，大家攏總講屬靈个語言，一般人抑係毋信个人入來，敢毋係會講你等發癲了係麼？
24 若係大家全部傳講上帝个真道，毋信个人抑係一般人入來，佢會因為所聽到个話來反省自家个罪，良心受責備；
25 心內囥等个事一顯明出來，佢就會伏等敬拜上帝，承認講：「上帝正經在你等中間！」
26 兄弟姊妹啊，𠊎个意思係麼介呢？你等聚會个時，有人獻詩，有人教訓，有人得到上帝个啟示，有人講屬靈个語言，也有人翻譯。一切愛為到造就教會來做正著。
27 若有人愛講屬靈个語言，最多兩三個人講就好了，愛輪流來講，也愛有人翻譯。
28 若係無人翻譯，講屬靈語言个在會中就愛恬恬，自家㧯上帝講就好。
29 傳講上帝真道个，也係兩三儕講就好，其他个人就愛認真判斷佢等所講个。
30 在座个，若另外有人得到上帝个啟示，先講个就愛恬下來。
31 你等愛一儕一儕輪等來講上帝个真道，恁樣，大家就互相得到學習，得到鼓勵。
32 傳講上帝真道个人，應當約束自家个恩賜；
33 因為上帝所愛个毋係混亂，係和平。恁樣，就㧯眾聖徒个各教會共樣，
34 婦人家在聚會中愛恬恬；因為照猶太人个法律所規定，姖等愛順從，做毋得講話。
35 姖等若想愛明白麼介事情，轉去正問老公就好；因為姖等在聚會中講話係盡無禮貌个事。
36 上帝个真道敢係對你等來个？敢係單單傳給你等？
37 若有人自認係傳講上帝真道个，抑係認為佢有屬靈个恩賜，佢就應該承認𠊎寫給你等个係主所命令个。
38 若係佢毋承認，你等就毋使搭佢。
39 總講，𠊎个兄弟姊妹啊，你等應該追求傳講上帝真道个恩賜，也毋好反對人講屬靈个語言。
40 凡事愛照秩序，規規矩矩來做。